Məşhur dissident Vladimir Bukovski SSRİ arxivlərindən olduqca maraqlı və gizli sənədləri paylaşıb.
Sözügedən sənədlər içərisindən 1991-ci ilin 1 avqustunda SSRİ Daxili İşlər nazirinin 1-ci müavini general-polkovnik İvan Şilovun (hələ də yaşayır – red.) erməni silahlılarının əməllərini əks etdirən raportunu təqdim edirik. Yeri gəlmişkən qeyd edək ki, bu raport SSRİ rəhbərliyinin hücumları kimin təşkil etməsi, ermənilərin qanunsuz silahlı qruplarının mülki əhaliyə qarşı necə vəhşiliklər törətməsi barədə müfəssəl məlumata sahib olduqlarını bir daha üzə çıxarır:
"Azərbaycanda situasiya gərginləşir. İyulun 30-u saat 16:00 radələrində erməni millətçilərindən ibarət qrup tərəfindən Gədəbəy rayonunun Göyəlli kəndinə hücum cəhdi olub. Milis əməkdaşları və hərbçilər hücumun qarşısını alıblar. Xəsarət alan yoxdur.
Eyni günün axşamı Dağlıq Qarabağ Muxtar Vilayətinin Hadrut rayonunun (indiki Xocavənd ərazisi – red.) Zəmzur kəndində erməni silahlıları yolu minalayaraq, avtomat silahlardan yük maşınını atəşə tutublar. İki dinc sakin (azərbaycanlı) öldürülüb. Hadisə yerindən tank əleyhinə mina götürülüb.
İyulun 31-i saat 18:30 radələrində DQMV-nin Mardakert (indiki Ağdərə – red.) rayonunun Drambon kəndi (indiki Heyvalı kəndi – red.) ərazisində daxili qoşunların karvanı atəşə tutulub. Nəticədə 4 hərbçi və "Perm gənclik qəzeti”nin əməkdaşı yaralanıb. İki BTR zədələnib”./axar.az/
MediaFax
