08.09.2016
17:16
Türkiyəli musiqiçi Caner Tepecik müğənni Rəqsanə İsmayılova ilə bağlı şikayət edib.
C.Tepecik ifaçı ilə işbirliyi qurduğunu, amma pulunu ala bilmədiyini deyib.
O bildirib ki, Rəqsanə mahnılarının hazırlanması üçün 16 min dollar ödəməlidir:
"Azərbaycanda musiqiçi Hacı Nazim Məmmədovla çalışıram. 3 ay əvvəl Nazim mənə zəng etdi ki, sənətçi dostum var, onun 4 mahnısını aranjiman etmək lazımdır. Həmin ərəfədə çox işim varıydı, Emrahın serialının musiqilərini aranjiman edirdim. Nazimin sözünü yerə sala bilmədim, o, çox dəyər verdiyim, sözünə sadiq olan dostlarımdan biridir. Əlimdəki işlərə ara verib, gün ərzində iş saatımı 20-yə qaldırdım. 4 mahnını aranjiman edib, göndərdim. Nazimlə belə işləyirik ki, mahnını aranjiman edib göndərirəm, pulun yarısını mənə ödəyirlər. Aranjimanı dinləyib, geri göndərir, üzərinə başqa musiqi alətlərini canlı çaldırıb hazırlayıram, 1 gün sonra pulum butöv formada ödənilir.
Bir mahnını normal halda 3-4 günə hazırlayıb bitiririk. Mən pulumu aldıqdan sonra, müğənni istədiyi vaxt oxuya bilər. Rəqsanə xanıma 4 mahnı hazırladım. Nazimin sözünü yerə sala bilmədiyim üçün mahnını göndərdim, pulun yarısı ödənilməliydi, olmadı. Mən mahnını tam hazırlayıb verdim. 1 ay sonra mənə pulu bütöv ödəyə bilməyəcəyini, hər həftə bir az verəcəyini dedi. Nazimdən soruşdum, o da kömək etməyimi istədi. Rəqsanə xanımın bu istəyi ilə də razılaşdım. Etdiyim işin yarısının yarısından az – 2500 dollar ödənildi. Ümumilikdə 16000 dollar ödənməlidir”.
C.Tepecik R.İsmayılovanın ona hədə-qorxu gəldiyini bildirib:
"Mən də hər dəfə Nazimə zəng edirəm. Musiqiçi adamam, duyğusal insanam, özümü pis hiss etməyə başladım. Bundan əvvəl nə Nazimlə, nə də İstanbulda başqa müğənni ilə belə hadisə yaşamamışam. Türkiyənin ən məşhur simaları ilə işləmişəm, bu cür hərəkət görməmişəm.
Əlimdəki bütün işi atıb, Rəqsanə xanıma xidmət göstərdim. Pulum hələ də ödənilmir. Hər dəfə bir bəhanə uydurdu, hər dəfə "yaxşı" dedim, beləcə, 3 ay keçib.
Nazimə zəng vurub dedim ki, xəbərin olsun, Azərbaycanın Türkiyədəki səfirliyinə və Türkiyənin Azərbaycandakı səfirliyinə şikayət edəcəyəm. Rəqsanə xanım bunu eşidəndə, bizi mafiya ilə hədələdi.
Nazimə dedim ki, qardaşım, bəlkə biz səhv edirik, bizə borcu olan odur, yoxsa biz ona pul verməliyik?
Dostum mənim yanımda çox pis vəziyyətə düşdü, kaş bu halı yaşamazdıq. Amma buradan da deyirəm, Rəqsanə xanımla bağlı lazımi orqanlara müraciət edəcəyəm".
Musiqiçi əlavə edib ki, o, Azərbaycandan Abbas Bağırov, Zarina, Elton, Röya Ayxan, Günay İbrahimli kimi müğənnilərlə çalışıb, heç biri ilə problem yaşamayıb./axşam.az/
-------------------
09.09.2016
15:31
Müğənni Rəqsanə İsmayılova türkiyəli musiqiçi Caner Tepecikin onun haqqında səsləndirdiyi ittihamlara münasibət bildirib.
Millətinsəsi.az xəbər verir ki, dələduzluqda adı hallanan sənətçi qarşı tərəfin yanlış anladığını, məsələni həll etdiyini söyləyib.
Rəqsanə bildirib ki, Caner Tepecik artıq ona qarşı səsləndirdiyi ittihamları təkzib edib:
"Allah hər birimizə kömək olsun. Mən həyatda dostlarımı çox istəyirəm və onlara qiymət verirəm. Çalışıram ki, məndən heç zaman inciməsinlər. Amma dünən mənim haqqımda yazı çıxdı, boş-boş yazıb-pozdular. Mən isə susdum. Çünki günahkar olan adam həmişə qışqırar, danışar, günahı olmayan isə susar və sonda haqq yerini tapar. Sadəcə bəzi mətbuat nümayəndələrinə demək istəyirəm ki, hər şeyi halallıqla qazanın.
Vallah, bu həyatdan heç kim heç nə aparmayacaq. Bu gün həmin insan səhvini başa düşdü və təkzib də etdi. Biz bir millət olaraq niyə bir-birimizə "badalaq” vururuq? Şükür ki, heç kimin haqqına girməmişəm, heç zaman da girmərəm. Mən Allahdan qorxan insanam. Uca Rəbbim hər şeyi yaxşı görür” .
R. İsmayılova qalmaqalda adı çəkilən bəstəkar Nazim Məmmədova da müraciət edib:
"Nazim mənim illərdən bəri tanıdığım yaxınımdır. Olar bilər ki, hövsələsiz davrandı. Amma bizim ortaq dostlarımız, qardaşlarımız var. Hər şeyi bağışlamağı bacarırıq. Bizə yaraşmaz. Bizim o yaşımız deyil, nə reklama, nə də qalmaqala ehtiyacımız var.
Qoy, qalmaqalı yeni çıxan, tanınmaq istəyən müğənnilər etsin. Biz artıq sözümüzü demiş insanlarıq. Şükürlər olsun ki, haqq yerini tapdı, düz ortaya çıxdı”.
Xatırladaq ki, Caner Tepecik açıqlamasında Rəqsanənin ona 16 min manat borclu olduğunu və pulunu ala bilmədiyini söyləmişdi./millətinsəsi.az/
