"Ölkədə yol nəqliyyat hadisələri zamanı ölüm hallarının sayı ötən ilin müvafiq dövrü ilə müqayisədə 115 nəfər azalıb. Bakı şəhəri üzrə 50-dən artıq ölüm faktı azalıb. Bu böyük rəqəmdir”.
Bunu açıqlamasında Bakı şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi, polis polkovniki Vaqif Əsədov deyib. O bildirib ki, bu, sürücülər arasında aparılan təbliğatın nəticəsidir. V. Əsədovun sözlərinə görə, qəza faktlarının da sayı bu il yanvar ayının 1-dən avqustun 29-na qədər olan müddətdə 150-dən artıq azalıb: "Sərnişindaşımada da nizam-intizamın yüksəldilməsi məqsədilə mütamadi reydlər aparırıq. İlin əvvəlindən avqustun 29-na qədər 2000-dən artıq cərimələnmə qeydə alınıb”.
V. Əsədov son vaxtlar yol polislərinin azalan büdcəni doldurmaq məqsədilə sürücü və piyadaları cərimələməsi hallarının artması ilə bağlı iddialara da münasibət bildirib: "Bu ancaq dövlət yol polisi əməkdaşlarının fəaliyyətinə kölgə salmaq deməkdir. Əgər hərəkət iştirakçısı qaydaları pozursa, mən də yol polisi olaraq bunu aşkar edirəmsə, mütləq cəzalandırma sanksiyası olaraq inzibati protokol tərtib etməliyəm. İnzibati protoklun da tərtib edilməsi törədilən qəzaların qarşısını almaqdır. Ən azından küçə və yollarda təhlükəsiz davranış vərdişləri aşılanır. Bu gün piyadalarla bağlı problem yaşayırıq. Cünki ilin əvvəlindən bu günə kimi Bakı şəhəri üzrə piyada vurma faktları ümumi hadisələrin 57 faizini təşkil edir ki, bu da ciddi narahatçılıqdı. Ancaq buna baxmayaraq, piyadaların məsuliyyətə cəlb edilməsində əməkdaşlarımız demək olar ki, paytaxtın əksər yerlərində, yeraltı-yerüstü piyada keçidlərində reydlər aparırlar. Doxsan minə yaxın piyada saxlanılıb. Bu o deməkdir ki, piyadalar arasında da nizam-intizam gücləndirilsin”./qafqazinfo.az/
MediaFax
