Rusiya Müdafiə Nazirliyinin ötən bazar günü Suriyaya uçarkən Qara dənizə düşən və 92 nəfərin ölümünə səbəb olan Tu-154 təyyarəsinin qara qutusunun dalğıclar tərəfindən aşkar edildiyi xəbər verilir.
Virtualaz.org Rusiya KİV-lərinə istinadən xəbər verir ki, təyyarənin qara qutusunun aşkar edilməsi haqda hələlik rəsmi orqanlar şərh verməyib. Bununla belə TASS-ı məlumatlandıran mənbə deyib ki, təyyarənin qalıqlarının ilkin araşdırması və şahidlərin ifadələrinə əsasən Tu-154 laynerinin "mühərrikə kənar predmetin düşməsi nəticəsində” qəzaya uğraması versiyası önə keçib. Bununla belə mənbə pilot səhvi və texniki nasazlıq versiyalarının da araşdırıldığını bildirib.
Xatırladaq ki, təyyarənin sərnişinləri arasında Rusiya telekanallarının 9 əməkdaşı, Müdafiə Nazirliyinin Aleksandrov adına hərbi ansamblının 64 üzvü, o cümlədən ansamblın bədii rəhbəri general-leytenant Valeri Xəlilov, "Ədalətli yardım” xeyriyyə təşkilatının rəhbəri, Doktor Liza kimi tanınan Yelzaveta Qlinka və digər şəxslər olublar. Onlar Rusiyanı Suriyadakı Hmeymim aviabazasındakı hərbçiləri Yeni il münasibətilə təbrik etmək üçün gedirdi.
Yelzaveta Qlinka
Xəbərlərə görə təyyarənin qəzaya uğradığı anı görən və hətta bu anların videosunu çəkən şahidlər var. Onlardan biri Rusiya Federal Təhlükəsizlik Xidmətinin Soçi sərhəd dəstəsinin sahil mühafizə xidmətinin hadisə vaxtı dənizdə patrul xidməti həyata keçirən əməkdaşıdır. Həmin əməkdaşın adı açıqlanmır, ancaq "Kommersant” onun qəzanı araşdıran komissiyaya verdiyi ifadəyə əsasən yazır ki, şahid təyyarənin Adler aerportundan havaya qalxdıqdan sonra yüksəklik yığmaq əvəzinə sürətlə aşağı endiyini və bir neçə dəqiqə sonra dənizin səthi ilə toqquşub parçalandığını deyib.
Sərhədçinin dediyinə görə, Tu-154 təyyarəsinin havadakı vəziyyəti ona hətta eniş vəziyyəti üçün də qəribə gəlmişdi. Çünki təyyarənin burun hissəsi qeyri-normal vəziyyətdə yuxarı idi, sanki arxa təkərinin üstündə gedən motosikli xatırladırdı. "Bir neçə an sonra təyyarə quyruq hissəsi ilə suyun səthinə toxundu və arxa hissəsi parçalandı, ardınca sürətlə suyun dibinə getdi”-şahid danışıb.
Aviasiya üzrə ekspertlər şahidin danışdıqlarına əsasən belə qənaətə gəliblər ki, qəza hər halda ekipajın səhvi ilə bağlıdır. Çünki pilotlar təyyarəni həddən artıq cəld qaldırmağa çalışıblar və nəticədə layner qanadların qaldırıcı qüvvəsinin azalması ilə yüksəklik itirməyə başlayıb. Bildirilir ki, 2006-cı ildə "Rossiya” aviaşirkətinin Tu-154M təyyarəsi Donetsk yaxınlığında analoji situasiya üzündən qəzaya uğramışdı.
MediaFax
