10:02
"Qalatasaray” futbol klubunun baş məşqçisi Yan Olde Rikerinq istefaya göndərilib.
CNN-in verdiyi məlumata görə, müvafiq qərar klubun direktorlar şurası tərəfindən verilib. İstefaya səbəb klubun cari mövsümdə qeyri-qənaətbəxş nəticələr göstərməsi olub.
Hollandiyalı mütəxəssisin istefası ilə əlaqədar rəsmi məlumatın bu gün veriləcəyi gözlənilir.
Yan Olde Rikerinq 2016-cı ilin martında "Qalatasaray”ın baş məşqçisi vəzifəsinə gətirilib. Onun rəhbərliyi altında klub Türkiyə çempionatında 6-cı yer tutub və ölkə Kubokunu qazanıb. Hazırda Türkiyə Superliqasında "Qalatasaray” lider "Beşiktaş"dan beş xal az toplayaraq 3-cü yerdə qərarlaşıb
--------------
15:37
Türkiyənin "Qalatasaray” futbol komandasının yeni baş məşqçisinin adı məlum olub.
"Hürriyet”in verdiyi məlumata görə, "Qalatasaray”ın Super Liqanın son turunda öz meydanında "Kayserispor”a uduzmasından sonra klub rəhbərliyi hollandiyalı baş məşqçi Yan Olde Riekerinkin vəzifədən uzaqlaşdırılması barədə qərar qəbul edib.
Qərardan dərhal sonra yeni məşqçi axtarışına başlayan rəhbərlik "Karabükspor”un xorvatiyalı baş məşqçisi İqor Tudorun namizədliyi üzərində dayanıb. İ. Tudorun meneceri ilə aparılan danışıqlar zamanı razılıq əldə edilib. "Qalatasaray”ın İ. Tudor ilə 1,5 illik müqavilə imzalayacağı gözlənilir.
Qeyd edək ki, hələlik klub rəhbərliyi baş məşqçi dəyişikliyi barədə rəsmi açıqlama verməyib./APA/
