14:13
Bu gün Bakı Ağır Cinayətlər Məhkəməsində dələduzluqda təqsirləndirilən Elşən Kərimovun cinayət işi üzrə məhkəmə prosesi davam etdirilib.
Hakim Cavid Hüseynovun sədrliyi ilə olan prosesdə şahidlərin dindirilməsi mərhələsi keçirilib.
Hakim bildirib ki, şahidlərdən birinə dəfələrlə bildiriş göndərilsə də, o məhkəməyə gəlməyib. Buna görə də həmin şəxs barəsində məcburi gətirilmə qərarı çıxarılıb. Polis əməkdaşları həmin şəxsi gün ərzində tapıb məhkəməyə gətirəcəklərinə söz veriblər.
Bu səbəbdən məhkəmə prosesində qeyri-müəyyən müddətə fasilə elan olunub.
Zərərçəkmiş, iş adamı Mübariz Əzimov bildirib ki, E.Kərimov ondan təxminən 60 min dollarlıq tikinti materialı alıb qaytarmayıb: "Mən 2001-ci ildən Dərnəgül şossesində Tikinti materiallarının şatışı ilə məşğul oluram. 2015-ci ildə qonşu dükanın sahibi İbrahim mənə dedi Elşən Kərimov ondan tez-tez nisyə mal götürür və 15 günə qaytarır. Razılaşsam, məndən də mal götürə bilər. İbrahim özü zamin durduğunu dedi, mən də razılaşdım. Elşən malları aldı, mən də hamısını qaiməyə yazıb özünə verirdim. Mənə 20 günə borcunu qaytaracağını dedi, o müddət rəzində cəmi 6 min manat ödədi. İyirmi gün tamam olanda Elşən yoxa çıxdı.
Maraqlananda bəlli oldu ki, bizdən malları tikintidə istifadə adı ilə alıb başqasına satırmış. Onun Noxcanıda malları satdığı Nuru adlı şəxsi tapdıq. Nuru dedi ki, bütün malların pulunu nağd ödəyib, qiymətləri soruşanda bildik ki, Elşən materialları bizdən aldığından 30-40 faiz ucuz satıb. Başa düşdüm ki, Elşən bizi aldadıb. Sonra onu Yevlaxda tapdıq, dedi ki, Nurudan aldığı pulu bizim bazarda borclu olduğu başqa şəxslərə verib”.
M.Əzizov mətbuata müraciətində bildirib ki, E.Kərimov Abşeron rayon icra başçısı İradə Gülməmmədovanın qudasıdır.
---------------
19:16
Abşeron İcra Hakimiyyəti dələduzluqda təqsirləndirilən Elşən Kərimovun xanım icra başçısı ilə qohumluq münasibətlərinə aydınlıq gətirib.
Saytımıza daxil olan məlumatda bildirilir ki, sözügedən şəxs Abşeron Rayon İcra Hakimiyyətinin başçısı İradə xanım Gülməmmədova ilə hər hansı bir qohumluq əlaqələrinə malik deyil:
"İradə Gülməmmədovanın Elşən Kərimov adında qudası yoxdur".
Qeyd edək ki, bu gün Bakı Ağır Cinayətlər Məhkəməsində dələduzluqda təqsirləndirilən və icra başçısının qudası olduğu deyilən Elşən Kərimovun cinayət işi üzrə məhkəmə prosesi davam etdirilib. O, təxminən 60 min dollarlıq dələduzluqda ittiham olunur./qafqazinfo.az/
