Əflatun Amaşov: "Reklamı və heç bir gəliri olmayan, amma həmişə peşəkarlıq və vətənpərvərlik umulan bu biçarələr bəs, nə ilə yaşamalıdır?”
Milli Məclisin deputatı, Mətbuat Şurasının sədri Əflatun Amaşov dekabrın 7-də parlametdəki büdcə müzakirələri zamanı elektorn KİV-lərə - aparıcı saytlara da dövlət büdcəsindən vəsait ayrılmasını təklif edib.
Ə.Amaşov xahiş edib ki, büdcə layihəsində bəzi sahələr üzrə xərclər azaldılsa da, bu, media sektoruna şamil olunmasın. Deputat KİV-in İnkişafına Dövlət Dəstəyi Fondu üçün gələn ilin büdcə layihəsində nəzərdə tutulan 4 milyon matanın 5 milyona çatdırılmasını təklif edib.
Mətbuat Şurasının sədri qeyd edib ki, həmin 1 milyon manat hesabına hazırda normal fəaliyyət göstərən 30-dək ciddi xəbər saytına dövlət dəstəyi göstərmək olar.
Ə.Amaşov jurnalistikanın ölkədə ictimai rəyin formalaşmasında və ölkənin dünyada təbliğində mühüm rol oynadığını deyərək bildirib ki, bu sahə ilə bağlı qənaət rejiminə keçilməməlidir: "Son 1 ildə istər qəzet kağızı, istərsə də çap xərcləri kifayət qədər bahalaşıb. Ümumilikdə KİV-lərin satışı çox zəifdir, reklamlardan gələn gəlirləri də kifayət qədər aşağıdır. 2016-cı ildən ölkəyə gətirilən qəzet kağızlarına ƏDV-nin tətbiqinə də başlanılıb. Bütün bunlar vəziyyətə neqativ təsir göstərir. Hazırda intenet media da ictimai fikrin formalaşmasında əsas vasitəyə çevrilib. Azərbaycanda 30-dək xəbər portalı normal qaydada fəaliyyət göstərir. Gələcəkdə bu rəqəmin artacağı istisna deyil. Buna görə də bu tip media vasitələrinin nəzərə alınması vacibdir. Ümumiləşdirmə apararaq təklif edirəm ki, KİVDF-yə ayrılmış 4 milyon manat vəsait artırılsın. Məhz internet medianın maliyyələşdirilməsi üçün ən azı 1 milyon manat ayrılmalıdır. Reklamı və heç bir gəliri olmayan, amma həmişə peşəkarlıq və vətənpərvərlik umulan bu biçarələr bəs, nə ilə yaşamalıdır?”.
Ə.Amaşov Azərbaycan gənclərinin xarici ölkələrdə təhsili üzrə proqramın dayandırılması ilə bağlı da çıxış edib: "Ola bilsin, əvvəllər buna səbəb olan müəyyən problemlər yaşanıb. Nəzərdə tutulan sayda - 5 min gənc xaricə göndərilməyib, göndərilənlərin də xeyli qismi ya ölkəyə qayıtmayıb, qayıtsalar da uyğun işlə təmin olunmayıblar”. Ə.Amaşov bildirib ki, qlobal şəraitdə müasir təhsil, xarici təcrübəyə yiyələnmək hər bir xalqın hərtərəfli inkişafının başlıca şərtidir. Ona görə də xaricdə təhsil proqramı mütləq bərpa edilməlidir. Təhsil Nazirliyində rəhbərlik dəyişdikdən sonra müsbət addımlar atılıb. Mən ümid edirəm ki, bu məsələ də tezliklə dərindən araşdırılacaq, müasir tələblərə cavab verə bilən yeni proqram hazırlanıb həyata keçiriləcək. Yeni təhsil ilinədək biz bunu gözləyirik"./musavat.com/
MediaFax
