AFFA iki ölkənin milli yığmaları arasında yoldaşlıq matçının keçirilməsindən imtina haqda İraq Futbol Assosiasiyasına məlumat verib.
Bu barədə İraq kİV-i xəbər yayıb.
Məlumatda bildirilir ki, iraqlılar görüşü 18 martda keçirməyi təklif edirdilər. Əvvəlcə onlar Azərbaycan yığmasını Tehrana (İraq milli komandası dünya çempionatı-2018-in seçmə oyunları çərçivəsində 23 martda Avstraliya ilə nəzərdə tutulmuş matça hazırlaşır) dəvət edirdilər. Ancaq sonra İraq tərəfi Bakıya gəlməyə razı idi və hətta, İraq saytlarının xəbərinə görə, AFFA-dan ilkin razılıq da almışdı. Lakin sonra Azərbaycan, milli çempionatdakı sıx qrafikə istinad edərək, bundan imtina etdi: 18-19 martda Azərbaycan premyer-liqasının 23-cü turunun matçları olacaq, 20 martdan isə DÇ-2018-in seçmə oyunları çərçivəsində Almaniya ilə ayın 26-da Bakıda keçiriləcək matça hazırlıq başlayır.
İraq yığması sparinq-ortaq axtarışlarını davam etdirir. Xatırladaq ki, daha əvvəl Livan və Tacikistan da iraqlılarla oyundan imtina edib.
Azərbaycanın yığması isə, məlum olduğu kimi, 9 martda Dohada Qətər yığması ilə yoldaşlıq görüşü keçirəcək./virtualaz.org/
MediaFax
