13:53
Dekabrın 20-də Rusiya, Türkiyə və İran xarici işlər nazirlər arasında Suriya böhranı ilə bağlı görüş keçirilə bilər.
"Tasnim” agentliyinin verdiyi məlumata görə, bu barədə razılıq Rusiya xarici işlər naziri Sergey Lavrovun iranlı həmkarı Məhəmməd Cavad Zərif ilə telefon danışığında əldə edilib.
Görüş Suriyada proseslərin sürətli inkişafı nəzərə alınaraq zəruri sayılıb.
Qeyd edək ki, bundan əvvəl Rusiya prezidenti Vladimir Putin Qazaxıstan prezidenti Nursultan Nazarbayev və Türkiyə prezidenti Rəcəb Tayyib Ərdoğanla Astanada Suriya ilə bağlı görüşün keçirilməsi barədə müzakirə aparıb./APA/
---------------
16:48
İran, Rusiya və Türkiyə xarici işlər nazirlərinin Moskva görüşünün vaxtı dəyişdirilib.
İran mətbuatının yazdığına görə bu ölkənin xarici işlər naziri Məhəmməd Cavad Zərif rusiyalı həmkarı Sergey Lavrov və türkiyəli həmkarı Mövlüd Çavuşoğlu ilə telefon əlaqəsi saxlayaraq Suriyanın Hələb şəhərində baş verən hadisələri müzakirə etmək üçün üçtərəfli görüşün keçirilməsini təklif edib. Tərəflər təklifi qəbul edib və dekabrın 27-də Moskvada görüşmək haqqında razılıq əldə olunub.
Lakin hadisələrin sürətli inkişafı görüşün tezləşdirilməsi ehtiyacını yaradıb. M.C. Zərif yenidən həmkarlarına zəng edərək görüşün dekabrın 27-dən 20-nə keçirilməsini istəyib. Tərəflər bu barədə də razılıq əldə ediblər.
Qeyd edək ki, Suriya böhranı ilə əlaqədar son iki gündə İran və Türkiyənin xarici işlər nazirləri arasında bir neçə dəfə olduqca gərgin telefon danışıqları aparılıb.
Xatırladaq ki, Hələb şəhərinin üsyançılardan azad edilməsi üçün onun bombardmana məruz qalması humanitar fəlakət yaradıb. Dağıdılmış şəhərdə qalan insanlar ən adi tibbi xidmətdən də məhrum olublar. Bombardmanlar kütləvi şəkildə qadın və uşaqların ölümü ilə nəticələnib./AZƏRTAC/
