Akif Çovdarov "Yeni Müsavat”ın iki ay öncə yazdığı şok xəbəri bu gün təsdiqlədi
Ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində təhlükəsizlik Baş İdarəsinin sabiq rəisi, general-mayor Akif Çovdarovun və onunla birgə tutulan digər 4 sabiq MTN-çinin işi üzrə məhkəmə davam edir. Məhkəmənin əvvəl Bakı Hərbi Məhkəməsinin binasından keçiriləcəyi bildirilsə də, sonradan proses Sabunçu Rayon Məhkəməsinin inzibati binasına dəyişdirildi.
Məhkəmənin keçiriləcəyi yerin dəyişdirilməsinin səbəbi barədə ilk olaraq "Yeni Müsavat” sentyabr ayının 16-da yazmışdı.
"Yeni Müsavat”ın əldə etdiyi xəbərdə o da bildirilirdi ki, A.Çovdarovun prosesi keçiriləcək məhkəmə zalında audio-videoyazılışları aparan "Femida” sistemi quraşdırılıb ki, bunun köməyi ilə prosesi məhkəmədən də kənarda canlı izləmək və yayınlanmasını təmin etmək mümkündür. Bugünkü prosesdə Akif Çovdarov bu xəbəri şəxsən təsdiq edib.
"Bütün buradakı kameraları mən quraşdırmışam və hansının necə işlədiyini də yaxşı bilirəm. Bilirəm ki, burada baş verənlər müvafiq orqanlar tərəfindən izlənir və sonradan həmin materiallar Eynulla Fətullayevə ötürülür. Yığışdırın bu işləri!”,- deyə, həbsdəki general bildirib.
MediaFax
